KRISTIAN KHANGLAITE LEH FACEBOOK

 KRISTIAN KHANGLAITE LEH FACEBOOK

                                                                                         ~ Rev.Lamsuanthang

Internet tungton a thukizahna tuahna chikhat social networking website facebook kichi tulai khangthate lah a lar mama mai leh tulai khangtha tamzaw ten a ngawlpi mai uh facebook ana hi hi. Tamkhu February 4, 2004 a United States ah Mark Zukerberg leh a lawmte 3 in amau college teng kithuzahna dinga ana pat khiet uh ahi hi.Amauten a bawlkhiet lai un gamdang leh tua kizah dan bang tah a zah ding in lungsim ana nei sih uhi hinanleh tulai in leitung ah nasa tah a hoi lam hin a hoilou lam ah nasa tah in ki zang ta hi. Tu leh tuin mi facebook zang leitung ah 1.11 billion val bang in facebook zang aki chi hi. Tam facebook in nasa tah in mite lungsim la a nichin hun chin leh dahkal chin in zangtu/facebook user ki belap hul hul hi. Ei ZPYF khanglaite zong nichin in facebook zang iki belap zung zung uhi.

Ka thei khiellou leh kei ma ngei zong 2009 apat in facebook id kana nei pan ta hi. Tua hun lai in gamdang a um agencies tuam tuam te toh ki thuzah tua na in kana zanga tua bang in ka zang thei nai sih hi. Tuni tan ah facebooker khat ka hi jieh in ka kunga dohna hing ki dong jel khu ahi leh “Facebook khu Christiante a ding in a hoi ei chi ahi.” Direct in hoi zong ka chi thei sih a sie zong ka chi thei sih hi. Ahin tam Bible chang toh ki tuah a facebook zangte a ding in vang a siet na um lou ding hi “Na sep na bawl ta pou un Mangpa thupi na ding in bawl un. (1 Corinthians 10:31). Mangpan Ama loupi na dinga I facebook ID te izah sah phal uh leh a sietna um lou ding in ka thei hi. Leitunga I unau tam tah tam bang internet tungton a kithuzah tua na khoi pha lou khoi thei lou tampi a um lai a Pasian in ei tambanga te zang thei dinga vangphat na angpieh pen Pasian loupi na mama dinga zah ahi na dinga pan I lah ding uh ahi.

Facebook group ah ei khanglai Group tuam tuam a um ta a ZPYF leh Unit tan min in facebook group I neita uhi. Tuate ahi leh ZPYF VOICE, PYF KIUKIAU(Central Church),KHRISTIAN TANGKOU (I synod uh thu thang tuam taum post na), KHANGLAI AW (Lailam veng PYF) leh ZOMICOLONY PYP (Zomi Colony PYF). Tam Group te tuni tan a et in Manpha mama mai hi. I Hattuampi Bangalore, Delhi leh Shillong te Programme bangkim leh eima sung thu tuam tuam toumun ah ki thei thei ahi jieh in Manpha kachi mai hi.

Ahin Khanglaiten tunin i facebook jah dan uh en tha lei ut huai kasa hi. Na wall ah Pasian in loupi na a tangnai, na comment ah Pasian in loupina a tang nai, na inbox ah Pasian in loupina a tangnai. Bangzatvei Pasianthu leh Bible chang hoi tah tah te na wall ah na post in na share kha tai? Ahi lou leh mi chou koi mai mai gitlou ham koi mai mai, Hattuam leh Nam lamkaite dem khop leh eima ki thei loupi a Lamkai te homtho khop mai mai in na facebook comment leh post ten a zang ama. Ahi lou leh mu tha da huai tah mai in na lim(Picture) sa guah phiel phiel a post a tua a mi comment cool, sexy, ur beautiful hing kichi mai mai pou a lungkim ima ZPYF khanglai facebook ID nei te teng teng in atha in khatvei I ID I zah dan en in “Khanglai khavel heng lamdang ding”, Khanglai mi dangte ading in”, Khanglai Mangpa Jesu Christ a ding in” chite toh ki tuoh in I facebook na uai ki en tha va ui. Khanglai in isep I bawlte Mangpa thupi na ding in bawl va ui