I GAM I NAM IN I POIMAW PEN PASIAN APAT HALTHANA

“Nangma a namite kipah thei nang in na hing suhal kia sih ding amah?” Psalm 86:6
~Rev. Lamsuanthang
Israelte Babulon saltana apat asuoh tat jou nua uh ahia tam i chang tel na mun tah uh. A saltan lai uh suoh(Slave) ahi lai bang lou tah un lamchi tuam tuam ah a zaleen ta ua, Politics ah a loching ua, innten louten ah zong suoh ahi lai sang un nasa tah in a hoizaw tham mama mai uhi, khotang vai ah zong melma khutnuoi a um non lou ahi jieh un azaleen mama mai uhi. Ahivang in itheisa ma bang in salam lochinna ten hagau lam kipahna pethei lou ahi jieh in Pasian hutdamna kipahna anei thei kia na ding uh lunggul in Psalm gieltu in “Nangma a namite kipah thei nang in na hing suhal kia sih ding amah?”chin Psalm. 85:6 ah ana giel hi.
Tami mun ah a poimaw mama mai chu ahi leh leh “Nangma ah”chi khu ahi. Khovel kipah na chi tuam tuam a kipah mai hi lou un Nangma ah, Pasian ah,kipahna khu a genna ana ahi hi.Tahsa khovel sil a kipahna in bangtan a dai mawng mawng sih a hinanaleh Pasian a pat Jesu Christ apat a kipahna dih tah khun kipahna bukim van leh leitung in a pieh thei lou kipahna ahing pethei ahi.Tamte jieh a Psalm gieltun “Nangma ah kipahna” ana chi vil vel ahi hi. Tuajieh in tunin Pasian apat a suoh kipahna halthana i poimaw tah jet uh ahi.
Tunin eite zong Isrealte mabang in igam eima mimal inn teen louten te zong i changkang ta mama mai uhi. Nidang a Lamka a i haw chienga giehna ding zong i mu jou lou lai in, tuin vang a veng a veng ah imi isa um in eima te mama in zong Lamka lah te ah inn nei in anei lou topte zong nidang banga buai nawn sam lou in hinkhua i zang ta uhi.Gari keeng linei, Gari keeng ni nei te khu i khua te ua a um louna aum nawn ta sih hi. Rev. Kamkhosoi South Korea a Laisiangthou jil ahing tun chil lai ei Zotang Biel Pastor ahing hi lai athugen khat “South Korea ah michin in Mobile phone a toi ua innchin ah TV aum hi” achi khu lamdang leh loupi isah mama khu tu in ei kungah ang tung ta mai hi. Tambang a Pasian lungsietna lam tuam tuam a tanga hinkhua iman lai un Mangpa ah kipahna tah tah nei lou a tam leitung silte chau a iki ngah leh ihinkhua ah i buching mawng mawng sih ding ua tamte hagau kipahna ahing pe thei mal mal sih ding hi. Hagau kipahna i nei lou chieng in sil bangkim nei in bang chi tuh in khangtou nanlei Kumpi Solomon in ana gen ma bang in “bangma loute bangma lou” ahing suoh lel ding hi.
Pasian apat halna dihtah leh kipahna dihtah miten a tan chieng un a thupi thei mama mai hi. Laisiangthou i et chieng in Pentecost a halthana atun in a thupi maama mai a Peter sermon na ah khatvei thu in mihing 3000 in pianthana anei uhi. I na gen minthang mama mai uh Wales gam revival ichite, England ate America ate i et tha tha chieng in tamte khu Pasian apat a halthana tah tah ahi dan lam tuam tuam ah muthei in a um hi. Wales gam a halthana in mihing 50000 in hattuam ah kibelap tha a, Ireland ah zong mihing 2,00,000 in hattuam a belap tha a, athupi mama a kigen D.L Moody hun a halthana in mihing 5,00,000 te khu hattuam ah aki belap tha chi ahi hi. Ju juate khu a ut le ut lou thu hi lou in a lei ding um nawn lou ahi jieh in a ju jua na buh uh a kha mai uh ahing ngaita hi. Cinima hall te ah cinema en ding mi kimu jou nawn lou in aki khah a Super market te leh
tuam tuam te in aki zang ta hi. Mite khu Biehinn lam del Pasian toh ki pawl mai khu a hing lunggul tau hi.Tambang Pasian apat halthana a tun chieng in khotang leh a tuam tuam te ah ki heng lamdangna nasa tah in um jel hi. A thonginn/Jail teng uh kikhah siang kichi lai hi. Mizoram ah halthana a tunlai in tambang in a na kigen hi. Pu Lloyed in tambang in ana giel hi. “British te khutnuai a ium lai un Governor khu khatvei Mizoram enkhe ding in a hing jin a tuahun lai in aw Thonginn/Jail/suangkul vengtupa a lungkham mama mai achi hi ama Jail a koima m lou ahi jieh in Silchar a Jail vengtu pa ahoupi a a Jail a mi neukhat khelsah ding in achiel hi” achi va ia hi. Tua leh England a John Walesly hun a halthana thupi tah atun lai in mite zingmawng vot mama vua nuai ah dah 2, dah 3 leh dah 4 lah ah gamlapi a um suangmeihol toute kung ah Pasian thugen ding in va kuan jel uh achi hi.
Tunin ei Zou namte leh hattuamte lah ah tambang halthana mawng mawng ki experience ngai vot lou(ki tang kha ngai nai vot lou) in kingai zong ki ngaithei lou hiva chi lungsim ah ahing lut hi. Tambangte i minam i pawlpi ten a tanthei na ding in tunin koi pou in pan lah angai ta hi. Zotang district ah akum leh a hun ka thei chien nawn ta sih a Rev H. Nengzatun Biel pastor ahi lai in District committee te lamkai na leh Bial Pastor pan lahna in i district khochin ah Evan. Thawnkhansuan zang in Crusade te a ban aban in kibawl a mi abang lou zong leh tua hun lai in Pasian hagau in i district te hing ve in ka thei a i district khawmpi te leh ki vaihawemnate zong anuam thei mama mai hi. A hin i gam i nam in tam a tunga igente uh tobang Pasian apat halna pen ki chiem kha nai vet lou hi
Laisiangthou I et chieng un “… ka mite ki ngaingiem a, athum ua, ka maipha a sui ua, a umdan gilou uh aki heisan uh leh, van a kipat kana ngaikhe dinga, akhelna uh ka ngaidadm dinga a gam uh ka dam sah ding hi.” II Chronicles 7:14 achi hi. Halthana I gam ua ahing tun thei na ding in tam Bible chang thei chian a tamna i Mangpan a gen bang a um angai hi. Mite gam bang in khatvei mawng mawng i gam ah halthana Pasian apat a kipahna dih tah hing tung leh “mite khang aw kikhel in nau bang in a nuita u eiten ning ju kham thei i ham siet ding” chia la a sah sah ngai nawn sih dinga, Politics, social, economic ah zong nasa tah in mit a muthei in hing ki changkang tou mai ding ahi. I Mangpa Jesu in agam leh a dihtatna sui masa un tuachin a dang teng pieh belap in na um ding uh ana chi ta hi. Tuajieh in i poimaw pen chu sildang teng sang in Mangpa apat a halna dihtah nei khu a hing poimaw mama ding ahi.
Tambang halna I nei thei nai sih ua zong I nei ngai nai sih ua tuni tan ah koima in tambang halna ngainat dan zong kithei nai lou ahi hi. Upaten Gultuh ngai lou mihing in gultuh nat dan thie lou ana chi te toh ki bang phot lai ihi uhi. Ahivanga a igam in apoimaw tah mai khu Pasian apat a halna leh kipahna sildang hilou in PASIAN APAT A HALNA LEH KIPAHNA DIHTAH AHI.