AW HINGPEI UN MANGPA KUNGAH THUNGEN VAI

                        AW HING PEI UN MANGPA KUNGAH THUGEN VAI

                                         (Gam leh Nam dam na ding in)

                                                          Rev. Lamsuanthang Gospel Columnist Zogam Today

I gam leh I Namte in bang chi lai pou in thumna a poi maw gige hi. Nam a ding a thumna khu  ut leh thum a ut leh thum lou ding hi mai lou in tam khu phutluih ahi. Mi tamtah ten buaina ahi lou leh sil chituom khat ahing pieng chieng in Nam a ding in I thum pan uhi. I nam in buain a nei chieng chau ua ithum jieh ua buazina I nei uh ahi. chin Nag Wa log in a na gen hi.

Ka kungah thu a nget ua, a gamtat hoiloute a tawpsan ua hi leh van pan in keiman amau ngetna ngaikhe vang in a khelna te uh ngaidam vang in , tuachin a gamsung uh ki ningchin na guan kai ta vang 2 Chro. 7:14

Thuhunlui i et chieng in Pasian in amite a ma thu toh ki gamla leh athupieh te jui talou amau deidan a hikhuo ang jah tah chieng un amite tungah hasatna sil tuam tuam tung sah jel hi. Aki vaihawmna te uh thanghuai in umsah jel a, agamte uh mite khut ah pe jel a amaute khu mite suoh(slave) a um uh phal jel hi. Galkap mikhat, lamkai khat mai mai mit maw jieh in jong tam bang silte atung thei jel hi. Tam bangte teng teng pen leitunga ihin sung ua tung thei ding leh tung jel ding in koi ta lei ahin Pasian it tah a taten Mangpa kunga a nget chieng in Mangpan a tate thungetna sang jel a agam uh dam sah jel hi. Amite a sil bawlte uapat sa kisia a ama lam a jot kie chieng un Mangpan nual ngai loua a itna mawngbei toh ana lamtuo veve hi.

Tulai in amasa in I Pasian beihdan te uh en jual ta lei a chang chieng in hagau leh thu tah a Pasain bie  ibah lou hun tam mama mai ta hi. Milian milalte maivil na mai mai abah hunpi jong ang um jel mawh hi tualeh social gathering mai mai abah hun bang um jel hi. I biehpiehna bang uh ahi jua jua leh nuam sa Pasian thugen bang nui nang atam leh nuamsa thuthah mawng mawng ngai pei non lou i bah hun tam mama mai hi. Pasian thaunu kichi ten jong Pasian thutah ahi ding bang tah a igen ngamlou a mi koi ama khat hing lungtha khava chia a maipha en ibah hun tam mama mai ta hi. Ahin ka gen khiel lou leh aw “mi banglou deute i bawl chieng un ki dom vot lou jel hi”. Ka gen khiel leh ngaidam

Leitunga leh eima Nam sung mama ah biehna chi tuom tuom ki uma tampen a hoilou ithei chiet uh ikham jou lou uh ahita hi. Khenkhat te khu eima hattuam chau munuam in hattuam dangte muda gense pai eima hattuam ahi in hilou leh jong Pasian ta leh Jesu Krist adinga phatuom sem sawm chiet ihi lam ki manghil jel mawh hi. Khenkhat kia leu leu in Hattuom pawlpi thusim lou mama jel in Biehinn kai ngai lou kai kei lei zong Pasian bieh mawna ahi sih  chin Pasian nasemte thusim lou, ngaisang dan thei lou, Hattuom khu organization, NGO, political organization bang dan khat mai mai a ngai in bangma a sim hil hel lou mi tam tah ki um kia leu leu hi. Koi jong Pasian leh a hattuom te thusim lou, Pasian thu a ki bulphu lou pouma lamkai hin innsung pui pa ahin adang dang hinanleh sau pei mawng mawng lou ding ahi.

Hattuom a lamkai ding Executive Secretary, Bishop leh adang dang kiteel ding chieng in ei Pasian thaunu, Siampu, Upa kichi te khu Politics lam a election te sanga khozaw ibah hun tam mama hi.Nidang lai in chu Mangpa kei ka ching jou sih chi ahia tulai in kei lou koi e chi hi leh hing ki lawm ta hi. Vote sui leh vote hawl in aguh aguh in itai lele ua  bangkim bawlthei Pasian  a kinga ding leh ama thu ngai ding pen pen te ihi chi tah ua ahi leh “ bangchin hattuom pulam a kiteelna ki vaihawnna te siengthou leh dih thei ding in i lam en mawh diai”

Hattuom sungah beeh leh phung vai i hat sah mama jel uhi. Pasian in a sisan a alei sa hattuom sunga tam bang ang um gige pen sil da huoi leh huot huoi mama khat ahi hi. Nidanglai in sap(Englishte) Negro te suoh leh sal a anei lai un English te biehinn khat ah “ Dogs and Blacks are not allow” (Mivgom te leh ui te lut phallou) kichi Biehinn mai a kitah hi, tam khu Mivompa khat in amu tah in naa sa mama in kingaise mama in a kap ta hi tuachin Mangpa Jesu va ki lang in “ Kata aw nang gen lou kei jong lut thei lou kahi” achi ki chi hi. Tuazieh in Beeh leh phung i hapi bawl ua ahi leh beeh leh phung nei lou Jesu Krist in i hattuom i pawlpi sungte ua hinglut thei lou dinga vaihing hawm thei lou ding hi.

Tuazieh in tambang leh I gamtat dan hoi loute teng teng topsan in Mangpa kungah ki le kia in ngaidam ngen in thum lei Mangpan ei, I hattuom I innsung leh I namte hing damsah lai ding hi hingun Mangpa kungah kia va ui

Politics vai ah I et chieng in mi politics theidan leh ei politics thei dan ki banglou ata ama chi thei ding khop in um hi. Lenlai Editor Pu, Khupkholian in a lekha gel na ah Politics kipatna tambang in ana gen hi. “ Nidanglai in Greek te lah ah Polish kichi khuokhat ana uma tuate khuo khu ki thu tuoh mama mai ua, dihtat mama in ki it mama mai ua A khuo uh siengthou mama mai hi. Tam khuote apat a Politics hing ki lah doh a hing pieng doh ahi ana chi hi. Definition tuom tuom te lah a tami ka quote ut hi. Eiten Politics pen kidah huoi (dirty games) juou leh naal, ju dawn thei lou ten jong don tei tei ding leh a dang dang  te dan a la hi lei a ki lawm hi. I hattuom lamkaite bang Politics neukhat  sai (involve) kha a um leh top sah i ut phiel phiel uh a bang hi. Migam chang kang lam ah chu Hattuam lamkai Church leaders ten nang sai lou ua nang ki involve lou uh leh a chi jawsop uhi.

Lengtong Pounou in “Zomi te hai lua sa ing Zomi ka hi” ana chi dih kasah na tam mama mai hi. Nidanglai apat in igam leh inam a ding in hun manpha tampi a na ki ha suo a tam ta mama ding hi. Tuhun chieng in i level ki bahpi ding mi tampi economic Social leh Political ah na ki ban joulou a kipha joulou ta hi.Tamte khu lungsim kip leh hangsan i nei jou lou jieh te uh hi maithei hi. Tua leh Nam it na tah tah namdang khen khat neija/neitan ki nei joulou/i nei jou lou jieh uh himaithei hi. Eima metna/punna/phatuomna ding ahi pou leh i minam juo ngam phiel, hoi in hoilou hen lan chin in chin ta lou jong leh sum hing pe thei ding khat leh i beepa i innkuonpi khat ahi nah leh a dihlou leh a chit joulou na teng teng thei lou ki pang a hum ngam mai Politician kichi itam lai sie i gam pen miki pha jou lou ding ahi. Ei ma leh eima ki thangsiet in iki thangsietna in khat leh khat ki tha ngap lieng in um jelte hilei zong midang lah ah ki hangsan jou lou i bah hun tam mama mai hi. A chang chieng in eima mimal ah Zou minam it kama sum leh pai it chi ei leh ei kidong thei lei ut huai mama mai hi.

I Khotangte ua en kia ta lei, i tate ahoi ding leh a thuman ding uh i dei mama ua a siam hoi ding  mi dang khat ojapu, Pastor, hattuomte adang dang i koi ua eima iki koi thei sih uhi tuama bang in i hattuom te innsungte Namte a hoi i dei mama ua a siam hoi ding in midang khat i lam en ua ei iki pat sawm mong mong sih uhi. I tenkhompi i minam pi mama toh ki tuoh thei lou in iki buai buai uhi. MLA leh MDC te ikoi sang mama mai in Pasian naasem te leh Pasian hattuom Pawlpi te bangma in isim lou uh a bang mawh hi. MLA leh MDC te koi ngiem ding kachi na chu ahi laijang sih amaute khu mipi te vote jieh a lian thei hing hi ua mipite jiah a tamtan hing tung thei ahi uh chi kithei sah a ngai hi. Teel thaw leh tenkhiet (elected or selected) hinan le uh mipi um lou leh tambang tan tunglou ding ahi uhi. MLA leh MDC te chau in mi genthei te panpi thei ding in i koi ua  ahi laizang sih hi. I pawlpi muan huoi mama mai ZYO, ZSP, ZYA te tungton in i lawm i guol panpi ngaite, lianvai gentheite  panpi dan ding sui lei hing um mama ding ahi. Tambang liangvaite panpi thei ding leh amau a dinga guoljawlna ihi thei na ding in i pawlpi lamkai koi ama khat MLA leh MDC te maivil a ama ding mai angmasiel tah a ki pumpei ahoi sih ding hi tambang a iki pei uh leh KICHAIVOT ki hi ding ahi.

Tambang niai nuai teng lah ah aki hichi ding mawng avele chi thei khat in um hi. Ahin silpen a kikhel a um sih hi Mangpan Ka miten kungah thu a nget ua, a gamtat hoiloute a tawpsan ua hi leh van pan in keiman amau ngetna ngaikhe vang in a khelna te uh ngaidam vang in  tuachin a gamsung uh ki ningchin na guan kai ta vang achi hi. Tuajieh in tuni in Unau aw Mangpa lam juan vai in AW HING PEI UN MANGPA KUNGAH THUGEN VAI (Gam leh Nam dam na ding in) bang chi bang in hing suliam in hing satliam tama nanleh hing sudam in hing tung ding tha kai ding hi.