KUMTA AH PAN LAHTHA DING

KUMTA AH PAN LAHTHA DING

                                                                          

Kumtha 2014 a i din toh ki tuoh in ngaisutna tuom tuom lungsim ah ang ki lang hi. Leitunga mipil, mifel, mi manpha tam tah mai dam uh hen len 2014 ah nang leh kei bang in hinkhuo hing mang leh uh gam leh nam, hattuom leh Pasian a dinga jong nasa tah a manpha tah a hinkhuo zang thei ding tam tah in kum 2014 a mu thei lou leh mu ut leh mu ki nem mama nan leh zong mu thei lou a aum lai a, ei manphatna guntah zong nei lou amaute sanga thupina, bawltheina guntah zong nei tuan lou nang leh kei in tunia kum 2014 imu thei mai chu aw…. Pasian lungsietna ahi lou ichi thei sih uh hi.

Kumtha 2014 lut toh ki tuoh a langkhat lam a ki ngai sut dinga I dei mama khat uh ahi leh kumtha, huntha, haatha, nitha i mu chieng un I hinkhuote zong a kiem suh hiei hiei hi chi thei siam lei ut hguai mama mai hi. Kum 2014 ahing tun leh imu uh toh ki tuoh in ihin khuo uh khu kum khat in a kiam suh kia hi chi iki thei uh apoimaw mama mai hi hi. Kum 3 dam ding I hi leh I shina ding kum 2 in a vatta a kum 2 dam ding ihi leh kum 1 in a vat ta a kum khat dam ding I hi leh I shi ding kum a leeng lel lel ihi uh chite ki thei lei ut huai isa mama uhi.

Pasian in koima aimless in pui ngai lou hi. A reason (ajieh) hoi tah nei in mi puia, eima lam ah kinepna lian tah nei in ahing pui jel hi. Tuazieh in Mangpan eite ang deina le hing lam etna supiching ding in “…nua lam a mailam a guol jawlnate khu del zaw ding in hing dei hi “(Philippi 3:12). Forgive and forget khu Pasian in I hinkhuo a a dei mama te lah a khat ahi. Koi zong mai lam not theina ding leh khantou thei na ding in nua lam a sil umte mang hil a mai lam a silo umte del ngai hi. Koi zong aw nua lam a sil umte a um den gel den in khan tou nil eh masawn ni a nei ngai sih ding hi. Tuazieh in aw nualam a sil umte mmanghil in mailam a ei a dinga guol jawlna um te khu nasa tah in del zaw lei ut huai mama mai hi. Tambang in in kumtha ah hinkho tha  I zang thei dinga sil siam tha i hing hi thei ding hi.

Tukum 2014 kum bul a io din toh dung jui in tambang ki ngaisut na nei lei I hinkhuo hing su lam dang ngei ngei ding in gintatna lianpi ka nei hi.

1.      Kumlui sanga ki thunun zaw a, nisim a Pasian toh kipawlna bawltha dinga I thu kim leh a bul pan dih ihi ngal ding hi. Pasian toh ki thuo siamna nei loute ding in khovel jah saim a ham sa mama kalsuon zong a siamthei mama sih uhi. Tuajiah in i Bible simtha in Mangpa kungah thumtha va ui.

2.      Kumlui sanga Pasian bieh kikhop kai tam zaw ding leh ngai khawh zaw dinga thupuona bawl a tu January sung mama a ipat ngal leh kumlui sang in hun I zang/mang dinh zaw ding a I hun nei sunte a man pha thei pen in I zang thei ding uhi.

3.      Kumlui sanga sawm a khat pe hoi zaw dinga leh pe hoi zaw dinga lungsim nei a I nei leh Pasian mai leh hattuom mai a siam lou I kitan nate hing bei hiai hiai dinga I lungsim a hing nuam ding hi. Sawm a khat dih tah in pe lei eima tan vou sawm a kuate khu m,anpha tah in I zang thei ding hi. Kum peisa te ah I sawm a khat te dih tah a I pieh lou jieh a bang chi bang Pasian lungtha nate I tuoh jel uai chi ki en jel lei ut huai mama hi.

4.      Kumlui sanga mania masial loua  midang te a dinga hing zaw dinbga I thupua ahi leh mi dangte a ding in limn a leh lungkimna te I hing hi dinga . Kipahna lungkimna in I hinkhuo ah ahing jui ding hi. Mani chau chau masialte aki pah ngai mal mal sih uhi. Midangte a dinga hingte kipah thei zaw ua tua ding in  Mangpan hing dei hi.

5.      Lei a gou khol sanga van a gou khol ngai sang zaw a I nei I lam Mangpa a ding a pe phal gige mi ihi leh, van ah gou tam tah I khol dinga. Van a gou tam I khol pou leh van lam ah I lungsim a um dinga lei lam a lungsim in a hing subuai pha sih ding hi. ( azieh chu na gou umna ah na lungsim a um ding chi ana hi jieh in). Van lam hinkhuo toh lungsim I jah chieng in tam leitung khu ei ding in van gamm ahing suoh ding hi.

6.      Midang suliam leh lungsim sunat sah dia ki zang non loua, lemna bawltu hi sawm a I thugen hing ngaikhe tut e a ding a chi bang a aal ding a I hinkhuo I zah leh Krist gim namtui mun teng a pokhe tu I hi thei dinga, hin man um tah leh mi dangte a dinga hinkhuo sunuomtu I hithei gige ding hi.

7.      Hagau Mangthangte a dinga Mangpa kunga ngen a tam bang a hinkhuo I zah thei leh Setan hing soi sahna jieh a mitui luong ding pen a hing dal jou mama ding hi.

Tamte teng teng ban ah huntha Kumtha ah Pasian ma sui masa va ui Laisiangthou in a gam leh a dihtatna suimasa in tuachin a dang jousie pieh belap in na um ding hi achi hi. Bang lam bang lam ah Pasian sui masa a Pasian amasa a koi masa te khu Pasian in lamsang a toisang tei tei hi. Inam I gam I lei I hattuom, I innsung leh a dang dangte Pasian hing toisang lapsang ding I ut leh tukum kumtha a bang lam bang lam a Pasian I masa sah uh a gai hi. Pasian theipha lou phawpha lou namte hing thupi in hing lian nan leh uh a toplam ah vang lungsiet huai mama mai hi.

Christopher Columbus in America khomuolpi a mu8 doh lai in Pasian biehinn lam masa pen kichia tuazou USA gamkhat ahing suoh un Pasian ma masa sah pen ua a sum ua Pasian I muong hi (In God we trust) chia Pasian amasa pen a koi uh ahi jieh in leitung ah gam tazat jouzai um ma nanleh ama uh khupkhel ding koima um lou hi.

Pasian theipha lou gam tam tah Pakistan, India, China leh a dang dang te I et chieng in laisam na lam, pilna siamna lam pang ah Christian gamte phajou mawng mawng lou uh hi. Sum ‘eh Paai lam ah jong Kristian gam loute lei hausatna a gam sung ua piang tam mama nanleh sum leh paai hauna lam ah Americate vel pha jou mawng mawng lou hi. Eite zong I nam I gam ah Pasian bangkim ah ang masat chieng in iminam sim maw huai in tom vet vot nana leizong Bethlehem khoneu noukhat town zong hi lou hill station khat mai mai Judia gam a khopi town,city khujat joujaite sanga a neu jawh lou ma bang in eite zong Pasian in mite sanga neu  jaw lou ding in ang siam ding hi. Ahin Pasian masa lou a eima deidan eima hoisah dan a ipei ngai a I pei leh a toplam ah lungsiat huai mama te ki hi kha ding hi.

Laisiengthou ah Pasian in Joseph umpi a Joseph in bangkim a Pasian masas sah ahi jieh in govt. nnasep dan neukhat zong joil kha leh theipha loupe khu Prime Minister hing suo lel hi(Pian 39:2,3,21,23). Tam bang nna loupe septhei na ding hei a patsa pilna a lah ahiei ? Pasian apat tunglam a pat pilna ahi.

Mite toh kal kikim a kalsuon thei ding leh mite sanga sangzaw thei ding in eite a ding in lampi tuom tuom te lah ah Pasian ma amasa a koi a Pasian ma bel a, Kumtha imu toh ki tuoh a a hoilam gel a kingaisutna tha nei ding in hanchiem va ui